DIPROTŠEKE TŠA PHIHLELELO
NAFVSA e na le Karolo ya Phihlelelo, yeo e dirago gore didirišwa di hwetšagale go Maafrika-Borwa ka moka, kudu ditšhaba tšeo di bego di šaparegile. Ka go hlama ditirišano tša tshekatsheko le dihlongwa tše dingwe, e leka go fihlelela Maafrika-Borwa ka moka.
Diakhaebe tša Setshaba tša Difilimi, Video le Modumo, di amegile mo go diprotšeke tše mmalwa. Dihlongwa tša Thuto di laletšwa go bona difilimi le go ba le ditherišano ka taba efe le efe yeo di bonago go nyakega go e akaretša. Sekhwi se dirwa ka tšhomišano le barutiši le bafahloši. Nepokgolo ya lenaneo la phihlelelo ke go iša "paesekopo bathong", moo ditšhaba di ka holegago. Sekhwi se dirwa ka tšhomišano le mekgatlo ye mengwe bjalo ka dikolo, diintasteri tša maleba, dikereke, mekgatlo ya setšhaba le setšhaba ka kakaretšo. NAFVSA e nepiša ditšhaba tša magaeng tšeo di sa tsebego gore akhaebe ya difilimi e ama eng ka ge le tšona di na le tokelo ya go fihlelela tshedimošo
NAFVSA e ikemišeditše go diriša Mafelo a Bokgabo a Setšhaba, ao a agilwego ke Kgoro ya Bokgabo le Setšo go phethagatša maikemišetšo akhwi. Diholo tša kereke, tša dikolo le tša setšhaba le tšona di tlo dirišwa.
Re hlohleletša baagi goba mang le mang yo a nago le kgahlego mabapi le bohwa bja tsebeihlo (audio-visual) bja naga ye gore a bonane le rena ge ba na le dikgopelo tša go diriša ditirelo tša NAFVSA.
PROTŠEKE YA HISTORI YA MOLOMO YA MMINO WA SETŠO
NAFVSA gape e na le karolo yeo e šomanago le go lotwa ga dikgatišo tša molomo tšeo di tlatšago sekgoba ka go histori ya rena. Batho ba rerišwa ka ga ditaba tše di fapanego tše di theilwego godimo ga setšo, bokgabo, histori le kago ya setšhaba.
Kgoboketšo, go lotwa le phatlalatšo ya Mmino wa Setšo di hlatlošwa ka Pontšho ya Diletšo tša Mmino wa Setšo tše di thethago.
MABAPI LE TSHEDIMOŠO
Atrese ya Poso
Atrese ya Madulo
Go se be le diromelwa tša poso hle mo atreseng ya madulo
Mogala: 343 9767
Fekese: 344 5143/ 323 5287
Kgoro ya Bokgabo le Setšo
Dinyakišišo tše di dirilwego ka 1956 di hlotše gore theramelao e hlome Boto ya Setšhaba ya Difilimi ka la 1 Aprele,1964. Mohola wo mogolo wa Boto ya Setšhaba ya Difilimi e be e le go lekola tlhatlošo ya intasteri ya difilimi. Mehola ye mengwe e be e le go latišiša, koketšo, go lota le go dira gore badiriši ba fihlelele difilimi tše di dirilwego ka Afrika-Borwa. Go phethagatša mediro yekhwi Karolo ya go tsebja ka la South African Film Institute (Institute ya Difilimi ya Afrika-Borwa) e ile ya hlongwa. Leina la karolo yekhwi morago le ile la fetolwa go ba Diakhaebe tša Setšhaba tša Difilimi.
Ka la 31 Desemere 1979 ditiro tša Boto ya Setšhaba ya Difilimi di ile tša fedišwa. Diakhaebe tša Setšhaba tša Difilimi ebile karolo e le noši ye e šetšego gomme e ile ya šutišetšwa go Kgoro ya Thuto ya Setšhaba. Ka morago e ile ya ba karolo ya Diakhaebe tša Mmušo ka morago Diakhaebe tša Setšhaba ka 1982, gomme go tloga gona moo e šomilwe bjalo ka bobolokelo bjo bo kgethegilego bja direkoto tša tsebeihloaudio-visual go ya ka lereo le le dirišitšwego ka go Molao wa Bolotadingwalwa.
Ka 1985 mehola ya yona e ile ya katološwa go akaretša diraekhote, gomme leina ka fao le ile la fetolelwa go Diakhaebe tša Setšhaba tša Difilimi Video le Modumo. (NAFVSA)
Molao wa Diakhaebe tša Setšhaba tše difsa tša Afrika-Borwa, o thomile go šoma ka la 1 Janaware 1997. O beakanyetša kgoboketšo, poloko le phihlelelo ya direkoto tša tsebeihlo(audio-visual) tše di hlamilwego ke bobedi dihlongwa tša mmušo le tša praebete le batho mongwe ka mongwe. Gape e kgontšha Diakhaebe tša Setšhaba goba NAFVSA, thwii, go kgopela batšweletši le baphatlalatši ba ditšweletšwa tša tsebeihlo go fana ka dikopi tša mediro ya bona. Sekhwi ga se šome go ditšweletšwa tšeo di swanetšego go ntšhiwa/beeletšwa go ya ka Molao wa Boplotadingwalwa. Didirišwa tša tsebeihlo di ka hwetšwa gape ka go diriša ditšhutišo go tšwa go dikgoro tša mmušo goba mekgatlo, dimpho tša boithaupo, dikananyo le ditheko. Diakhaebe tša Setšhaba tša Difilimi, Video le Modumo di hweditše boleloko bjo tletšego bja Lekgotla la Ditšhabatšhaba la Diakhaebe tša Modumo (IASA) ka 1989. Ka 2002 di hweditše boleloko bjo bo tletšego bja Federeišene ya Ditšhabatšhaba ya Diakhaebe tša Difilimi (FIAF).
NAFVSA ke karolo ya Diakhaebe tša Setšhaba tša Afrika-Borwa ka fase ga Kgoro ya Bokgabo le Setšo. Diakhaebe tša Setšhaba tša Difilimi, Video le Modumo ke sehlongwa se noši sa setšhaba sa mohuta wa sona ka Afrika-Borwa.
Dinepo tša Diakhaebe tša Setšhaba tša Difilimi ke:
Go kgoboketša didirišwa tša tsebeihlo (tša setšhaba le tše e sego tša setšhaba) le tše di amanago natšo tšeo di dirilwego ka, goba ka ga Afrika-Borwa.
Go dira gore direkoto tše bjalo di fihlelelega go, le go hlatloša tšhomišo ya tšona ke Maafrika-Borwa ka moka.
Go hlatloša tšhomišano gare ga mekgatlo ye e lotilego direkoto tše bjalo.
NAFVSA ke sehlongwa sa mmušo seo se lotelago bohwa bja tsebeihlo bja naga meloko ya ka moso. Difomate tša go fapana bjalo ka difilimi, divideo, direkhote tša medumo le didirišwa tše di amanago natšo di ka hwetšwa ka go diakhaebe tša difilimi, video le modumo. NAFVSA e swanetše go bonwa bjalo ka sediba sa mothopothušo bja bohwa bja Afrika-Borwa bja tsebeihlo (audio-visual).
NAFVSA e na le phapoši ya go balela moo bafatišiši ba kago lekola dithušo tša khwetšo gammogo le methopo ya difiwa tše di khomphutharaisitšwego ka ntle le tefo. Go bogela goba go theeletša didirišwa go swanetše go be le peano pele ga lebaka. Tsebišo ya matšatši a mararo e a nyakega go dira gore didirišwa di phurologe pele ga ge di ka bogwa goba tša theeletšwa mo setlabelong se maleba. Didirišwa di ka fihlelelwa mo lefelong la NAFVSA ka tefo ye e beilwego ke Sešegotlotlo. Baithuti ba lego dikolong ba ka bona goba ba theeletša didirišwa ge ba dirile peano ka ntle le tefo. Tumelelo ye e ngwadilwego go tšwa go bengditokelo e a nyakega pele ga ge sedirišwa sefe le sefe se ka tšweletšwa ka go pedifatšwa.
Bokgobapuku bjo bo bopilwego bonnyane ka dipuku tše e ka bago 3000 go akaretša mahlakore ka moka a lekala la boithabišo, bo sa le bo thoma matšatšing a peleng a Boto ye e phatlaladitšwego ya Setšhaba ya Difilimi gomme e fo ba bokgobapuku bja ditšhupetšo fela, ka lebaka la kelo ya bontši bja dibolume Le ge go le bjalo, dipuku ka moka ka bokgobapukung di ka balwa ka diakhaebeng tša Difilimi, Video le Modumo, gomme go bile go ka dirwa difotokopi ka tefo ye nnyane.
The NAFVSA e na le kgoboketšo ya dipapetla tša difilimi tše e sego tša mehleng tše e ka bago sekete, tša go tloga moragorago kua mehleng ya MaVoortrekkere , e lego filimi ya diponego ye e šetšego ka Afrika-Borwa. Bontši bja dipapetla tšekhwi ke bja moswananoši gomme bo akaretša mehutangwalwa ka moka ya difilimi tša tikologo. Kgopolo ye botse ya diakhaebe mabapi le dipapetla tšekhwi ke gore di tsentšhwe ka go methopodifiwa (database) ka elektroniki mo di kago balwa ka ntle le go swarwa ka diatla.
Go dio swana le kgobokanyo ya dipapetla, akhaebe e na le kgobokanyo ya moswananoši ya diswantšho tšeo di amanago le difilimiponego (feature films) tša tikologo. Diswantšho tše e ka bago palomoka ya difilimiponego tše di tšweleditšwego ka nageng yekhwi go tloga ka 1916 di ka hwetšwa mokhwi. NAFVSA e na le kgobokanyo ya dingwalwa tša filimi tše e ka bago 1200 go tšwa go difilimiponego tšeo di dirilwego mono gae.. Bontši bja tšona ke dingwalwa tša pele ga tšweletšo, ka fao di fapana kudu le setšweletšwa sa sekrini se se fedilego.
NAFVSA gape ke moloti wa kgobokanyo ye kgolo ya direkoto tša pampiri tšeo di bopilwego ke ditokumente, disetwana tša dikuranta, diswantšho, mananeo le dipukwana tša kgale ka ga teatere, mmino, dingwalo le dikgabo. Bontši bja ditlakele mo sehlopheng sekhwi bo hlotšwe ke dimpho go tšwa go batho ka noši le dihlongwa tšeo di bego di na le kgahlego mo go dikgabo tša tiragatšo le dithalwa. Kgobokanyo ye e šutišeditšwe go NFVSA go tšwa go Khansele ya Saense ya Leago le Phatišišo Human Science Research Council HSRC
NAFVSA e swana e le noši ka lebaka la gore ke ye nngwe ya diakhaebe tše mmalwa lefaseng ka bophara tšeo di bolokago ditlakele tša diflimi, video le tša modumo lefelong le tee. Go fihlelela dikgobokanyo tšekhwi tšeo di tšweletšago histori ya Afrika-Borwa ka dibonwa, di bile, gomme di sa tla ba le thušo ye kgolo go meloko ya ka moso ya Maafrika-Borwa. Ba ka kgona go theeletša gabonolo le go bona seo se diregilego lebakeng le le fetilego gomme ba kgona go akanya gore diintasteri tša tsebeihlo di tlo ba bjang ka moso.
Ka lebaka la diphetogo tša lebelo ka go theknolotši, setlabelo seo se dirišitšwego mengwaga ye 20 ya go feta, lehono ga se sa šoma; le ge go le bjalo, se tla thuša go fa tshedimošo ya boithekgo, le kgahlego ya hisotiri mo taetšong ya tlhabologo ya diintasteri tša tsebeihlo.
